Соопштение за јавност

Филипче: Струја ќе поскапи, владата ја урна енергетската стабилност

Претседателот на СДСМ, Венко Филипче, остро предупреди дека државата се соочува со неминовен ценовен шок, поскапување на цената на струјата, како директна последица на неспособноста и неработењето на Владата на ВМРО-ДПМНЕ.

„Оваа влада го урна целиот концепт на енергетска стабилност. Сега неизбежно следува поскапување на струјата, а со тоа раст на сите други цени во државата“, рече Филипче.

Тој додаде дека е намалено домашно производство на струја на историски минимум, дека власта купува скапа струја од увоз и затоа ЕСМ веќе понудило цена на струјата за домаќинствата што се качува од 62 евра на 65 евра по мегават час, што значи драматичен раст.

„Оваа власт, како ниедна власт во историјата на државата, го спушти производството на струја на историски најниско ниво. Според енергетскиот план на ЕСМ којшто го донела оваа влада за 2025 година било во план да се произведат 5.100 гигават часови електрична енергија. Според извештаите на МЕПСО и МЕМО, од јануари до октомври се произведени само 2.450 гигават часови, односно за на неполни два месеци од крајот на годината ниту 50% од тоа што самата влада, тие луѓе коишто седат во влагата, владата, тие експерти во ЕСМ, самите го испланирале. Меѓутоа струја е потребна и што се случило? Купена е струја за многу повисоки цени отколку што би било ЕСМ да ја произведува. Ако производството на еден мегават час изнесува околу 80, 85, 90 евра, владата купува струја за 140 евра мегават час. Потрошени се 62 милиони евра за да оваа струја се надокнади тука за потребите на граѓаните.“ рече Филипче.

Владата сама си призна дека не може да произведе струја. Не ги активира домашните капацитети и затоа цената ќе расте. Кога расте цената на струјата, расте цената на сè – храна, услуги, транспорт, живот, додека тој.

Филипче потсети дека во времето на СДСМ биле изградени 1.000 мегавати нови обновливи енергетски извори, што било еднакво на капацитетот на Битола, Осломеј и Неготино заедно.

„Ние инвестиравме, тие уништуваат. Ние градевме капацитети, тие гасат капацитети. Ние создадовме стабилност, тие создаваат криза“, нагласи тој, додавајќи дека граѓаните веќе трпат последици од неработењето на владата.

Филипче ја повика владата да одговори: „Кој ќе биде одговорен за овој удар врз стандардот на граѓаните? Кој дозволи државата да го изгуби енергетскиот капацитет што беше граден со години?“.