Алксандар Саша Димитријевиќ е роден 13.09.1993 година во Скопје, Република Северна Македонија. По професија е дипломиран економист, насока Финансиски и Банкарски Менаџмент.

Во 2017 до 2021 година се вработува во Општина Гази Баба како дел од кабинетот на градоначалникот, на работна позиција Асистент на градоначалник задолжен за спроведување на ревизија во општината и јавните претпријатија кои ги основа истата, изготвување на ревизорски извештаи, координација помеѓу сектори, организација на настани и советник за младински политики. Истовремено е и член на повеќе работни комисии во рамки на Општина Гази Баба.

Во 2021 година е назначен за Директор на Медицински симулациски центар, здравствена установа со помошни услуги во образованието. На оваа функција останува до 2024 година, и за својот мандат има спроведено повеќе значајни развојни проекти за оваа институција.

Димитријевиќ со навршување на 18 години активно се вклучува во Социјалдемократскиот сојуз на Македонија, како активен член и поддржувач на политиките на партијата. Внатрепартиски има извршувано повеќе партиски функции како активен член во својата општинска организација. Во 2013та година станува претседател на Локалниот клуб на млади на СДММ Гази Баба. Во 2018 е избран за Претседател на Градската организација Скопје на СДММ, за потоа да биде избран и за Потпретседател на Социјалдемократската младина на Македонија. Активно учествува во сите изборни циклуси од 2011 година како дел од општинскиот и регионалниот изборен штаб.

Како претставник на партијата има учествувано на повеќе семинари и обуки во организација на Прогрес институт за социјална демократија, Меѓународен центар „Олаф Палме“ и фондација „Фридрих Еберт“.

На последните локални избори, Димитријевиќ е избран за Советник од редовите на Социјалдемократскиот сојуз на Македонија во Советот на Општина Гази Баба, а потоа станува координатор на советничката група на СДСМ.

На 27 Ноември 2024 година, Александар Саша Димитријевиќ е избран за Генерален Секретар на Социјалдемократскиот сојуз на Македонија.