Соопштение за јавност

СДСМ иницира нови предлог закони за поголема здравствена заштита и инклузија на лицата со ретки болести

По повод Светскиот ден на ретки болести, претседателот на СДСМ, Венко Филипче, заедно со заменичката претседателката Фани Каранфилова-Пановска, претседателката на Форумот на жени Даниела Колева и дел од раководството на партијата, одржаа состанок со Наташа Анѓелевска, претседателка на Националната Алијанса за ретки болести, на кој беа дискутирани потребните измени кои треба да направат за да се обезбеди подобра заштита и инклузија на лицата со ретки болести во здравствениот и социјалниот систем.
На состанокот се заклучи дека СДСМ ќе иницира предлог измени на неколку закони кои ќе дадат системски решенија за еднаков пристап и правичен систем кој ќе му овозможат на лицата со ретки болести остварување на нивните права и потреби.

Претседателот на СДСМ Венко Филипче ја нагласи потребата од подобрување на законската рамка, важноста од институционална поддршка и креирање одржливи механизми кои ќе овозможат долгорочно решавање на проблемите на лицата со ретки болести. Филипче нагласи дека пратеничката група на СДСМ ќе поднесе Предлог измени на Законот за здравствена заштита и Законот за лекови.

Во рамки на дискусијата од страна на претставниците на здруженијата на лицата со ретки болести беа истакнати предизвиците со кои се соочуваат секојдневно, како и потребата од инклузија во образованието, труд и социјалната политика. За таа цел СДСМ ќе се залага и за усвојување на Националната стратегија за ретки болести час поскоро, која ќе им овозможи на овие лица полноправна инклузија во општеството и пристап до неопходната здравствена нега. Дополнително СДСМ ќе поднесе предлог за ратификација на Стратегијата на Обединетите Нации за зајакнување на правата на лицата со ретки болести и нивно целосна интеграција во социјалниот и здравствен систем. Со овој чекор ќе се овозможи усогласување на националните политики со меѓународните стандарди и ќе се придонесе за поголема системска поддршка на пациентите.

СДСМ останува на страната на лицата со ретки болести и во реализацијата на заедничката заложба за создавање инклузивен здравствен систем кој ќе одговори на потребите на сите граѓани, особено на оние кои се соочуваат со ретки болести.