Прес конференција на СДСМ, Зоран Стојчевски – претседател на Општинската организација СДСМ, Битола

Почитувани, пет години ВМРО ОКГ, градоначалникот Коњановски и нивните директори ја водат Битола кон сè поголемо назадување.

Наместо развој и реализација на ветувањата, граѓаните добија загадување, нечистотија, партиски вработувања, јавни претпријатија со милионски долгови.

Од наследена позитивна милионска сметка, истата моментално е во долгови. Долговите растат, а резултатите изостануваат.

Општината има приближно 90-тина милиони денари доспеани и уште околу 40 милиони недоспеани обврски.

Долгот на јавните општински претпријатија надминува 120 милиони денари.

Во милионски долгови тонат и училиштата, а на некои од нив во одреден период им се закануваше исклучување на електричната енергија.

Чистотата на градот е на незадоволително ниво: депонии, непокосени тревни површини, преполни контејнери, непријатни миризби и нередени простори во секојдневието на граѓаните. Иако цените на комуналните услуги се зголемија, наместо уреден Драгор, граѓаните гледаат обраснато и запоставено речно корито.

Инфраструктурните ветувања останаа неисполнети. Од ветените повеќе кружни текови, два се импровизација во населбите Срелиште и Горно Оризари, а целосно изградениот кај старото ветеринарно е нефункционален за поголем проток на возила. Истиот е неколкупати прекопуван и предизвикува сообраќаен хаос.

Сè уште го нема ни новиот булеварски влез од страната на Охрид.

Го нема на повидок ни ветениот нов мултифункционален спортски комплекс, а Битола сè уште се соочува со назадување на спортот.

Фудбалскиот клуб Пелистер испадна во Втората лига, а фудбалскиот терен повеќе се користи за одржување на музички настани отколку за одигрување на фудбалски натпревари.

Ова е само дел од реалната слика за пет години владеење на ВМРО во Битола.

Повеќе долгови, повеќе проблеми и помалку развој.

Битолчани заслужуваат одговорност, решенија и вистински напредок, а не нови ветувања без резултати.

Линк до видео: