Соопштение за јавност – прес конференција на претседателот на СДСМ, Венко Филипче

Филипче повика на воспоставување нов општествен и политички дијалог

Претседателот на СДСМ, Венко Филипче, повика на воспоставување нов облик на политички и општествен дијалог, кој ќе овозможи дефинирање на долгорочна стратегија за развојот на државата. Тој истакна дека е неопходно да се изгради систем што ќе функционира во следните децении, независно од тоа која партија е на власт, со јасни насоки во клучни области од општественото живеење.

Филипче укажа на потребата од темелни реформи во правосудството, нагласувајќи дека е неминовно да се донесе реформска агенда и со широк консензус да се усвојат законски решенија што ќе обезбедат ефикасен и праведен правосуден систем. Тој истакна дека е од суштинско значење институциите да бидат ослободени од партизација, за да се воспостави фер и компетитивен систем во кој младите ќе можат да напредуваат врз основа на знаење и способности.

„Тоа што граѓаните најмногу ги иритира е партизацијата и политизацијата. Мора да ги ослободиме институциите од канџите на политиката и партиите, за да младите луѓе имаат навистина добар, компетитивен систем и на тој начин да се вработуваат и напредуваат. Само така можеме експертизата да ја издигнеме на соодветно и заслужено ниво“, истакна претседателот на СДСМ.

Понатаму, посочи Филипче, неопходно е да се донесат законите од реформската агенда во што пократок рок н начин на којшто ќе се постигне широк консензус не само политички, туку и со учество на други фактори од делот на правосудството на коишто тоа им е експертиза.

Филипче истакна дека потребни се сериозни промени во здравството и во образованието, кои, како што рече, мора да се тргнат од дневно-политичките пресметки и да се третираат како стратешки интерес на државата.

„Не може само да посакуваме подобро здравство, тоа навистина го заслужуваме. Јавниот здравствен систем мора да се подобри, исто како и образовниот, бидејќи повеќе не смееме да губиме генерации кои заминуваат во странство“, порача Филипче.

Во тој контекст, претседателот на СДСМ оцени дека е неопходно лидерите на политичките партии да се вклучат во овој дијалог и да работат на постигнување консензус за стратешките насоки на државата.

Тој најави дека во наредните денови ќе го презентира овој план пред премиерот, со очекување дека и другите политички субјекти ќе се приклучат кон оваа иницијатива. Филипче порача дека предолго се зборува за потребата од промени и дека е време да се преземат конкретни чекори во интерес на граѓаните и државата.

Претседателот на СДСМ, Филипче, најави дека ќе побара состанок со премиерот Христијан Мицкоски во најкраток можен рок, со цел да се отвори процесот на дијалог за клучните стратешки прашања за државата.

„Оставам простор за сите политички партии да го разгледаат овој предлог и да ја прифатат иницијативата за лидерска средба. Добро е прво да го поразговараме ова со премиерот, имајќи предвид дека тој прв подаде рака и изрази подготвеност за ваква средба“, изјави Филипче.

Тој истакна дека е неопходно политичките лидери да се договорат не само за темите што ќе бидат предмет на разговор, туку и за начинот на кој ќе се спроведе овој процес, кој досега не бил дел од политичката практика во земјата.

„На маса треба да се постават и методологијата и механизмите преку кои договорените решенија ќе бидат реално имплементирани“, нагласи Филипче.

Во таа насока, Филипче посочи дека ќе бидат разгледани различни можности – од формирање парламентарна комисија до создавање заедничка работна група во која ќе бидат вклучени експерти.

„Ова не сакам да биде готов план што ќе го сервирам, туку процес во кој сите мора да учествуваме заеднички, за да изградиме модел кој ќе обезбеди реални и трајни резултати,“ заклучи Филипче.