Соопштение за јавност

Текстот во Република, пренесуван од медиумите под контрола на Никола Груевски, само потврдува дека СДСМ како партија на граѓаните, како и сите други граѓани во Р.Македонија, се финансира согласно законските прописи во државата, од членарини, донации и преку кредити.

Сето тоа е во рамките на позитивните законски прописи.

Разбирливо е чудењето на Груевски и нивните мегафони, ако се земе предвид дека Никола Груевски и неговата власт 10 години работат противзаконски, богатејки се со криминал и корупција преку грбот на граѓаните до рајските земји.

ВМРО-ДПМНЕ е партијата којашто пред граѓаните и пред надлежните институции многу скоро ќе мора да објасни од каде им се милионите за лични и партиски цели со коишто ги донесоа луѓето и државата до банкрот.

Од кои средства ја подигнаа нивната тврдина, тешка според проценките меѓу 15 и 30 милиони евра.

Како Груевски ја покри финансиска дупка на партијата од 3.500.000 евра констатирана во извештајот на ВМРО-ДПМНЕ за изборите во 2011-та година?

Или, ако се вратиме уште поназад, ќе стигнеме и до парите во кеш што ги примала лично Јанкулоска како генерален секретар на партијата и почетоците на криминалната империја на Груевски и неговите помошници.

Никола Груевски и ВМРО-ДПМНЕ направија историско финансиско злосторство на државата, задолжувајки ги граѓаните со огромни 450 милиони евра плус камати!

Јавниот долг на Македонија го качија на неверојатни 5 милијарди евра или 54% од БДП и тоа без скриените долгови!

Го спроведоа криминалниот проект Скопје 2014 година тежок над 630 милиони евра!

За сето ова, Никола Груевски и неговите соработници, ќе одговараат!

Скопје, 22.07.2016

ЦЕНТАР ЗА КОМУНИКАЦИИ СО ЈАВНОСТА
СОЦИЈАЛДЕМОКРАТСКИ СОЈУЗ НА МАКЕДОНИЈА