Соопштение за јавност

Денеска во Љубљана членовите на ИО на СДСМ, Едмонд Адеми и Аднан Џаферовски се сретнаа со Матјаж Немец, потпретседател на словенечкиот Парламент. На средбата со Немец, Адеми и Џаферовски разговараа за повеќе актуелни прашања во двете земји, меѓу коишто и политичката криза во Македонија.

Претставниците на СДСМ ја истакнаа важноста за целосно спроведување на одредбите од Договорот во Пржино, функционалност на правната држава и организирање брзи фер, слободни и регуларни избори како неоходни чекори за излез од ситуацијата во Македонија.

Потпретседателот на словенечкиот Парламент Немец кој е социјалдемократ, ја изрази поддршката на пратеничката група на социјалдемократите на Словенија, на СДСМ и претседателот Зоран Заев, за големиот придонес што го даваат за мирно разрешување на длабоката политичка криза во Македонија, во интерес на граѓаните и државата.

Од страна на членовите на ИО на СДСМ беше изразена благодарноста до словенечките социјалдемократи и Република Словенија како држава, за значајната поддршка што ја даваат на Република Македонија и нејзините граѓани, посебно во напорите за демократизација и остварување на стратешката евро-атланска перспектива.