Соопштение за јавност

 

Кандидатот за градоначалник на Град Скопје, од СДСМ Петре Шилегов во текот на десеттиот ден од кампањата за локални избори 2017 (05-ти октомври), ја посети општина Аеродром.

Оствари уште една средба со граѓанските активисти од иницијативата „На точак“, со кои разговараше за инфраструктурини проекти со кои се овозможува непречен пристап за велосипедистите низ градот.

Шилегов ги посети дуќаните и продавачите во трговскиот центар во населба Лисиче, а го посети Усјанскиот канал и депонијата во тој дел од градот.

„По победата на 15 октомври, Скопје повторно ќе стане Град на хуманитарноста. Хуманитарноста ја враќаме како еден од нашите врвни приоритети. За разлика од досега, ранливите категории на граѓани, а наши сограѓани, лицата со посебни потреби кои што беа ставени на маргините на општеството, ќе бидат во еден од приоритетите за нивно вклучување во системот за обезбедување на можности за квалитетен живот, нормално секојдневие и ефикасно функционирање. Во тој контекст, секоја следна градска политика, инвестиција, секој тротоар и плоштад, лифт или зграда, кои што се под надлежност на градот и на општините составен дел од градот, мора да бидат инклузивни и за оваа категорија на граѓани. Градот на солидарноста не ги заборава луѓето од улиците. Градиме преноќевалиште за бездомници, со што ќе обезбедиме покрив над глава за секого во ладните скопски ноќи, и ќе нудиме и бесплатни оброци, основна здравствена хигиена. Новата градска администрација ќе обезбеди ефикасен пристап до европските средства, кои што досега целосно беа занемарувани. Преку нив ќе работиме на системска поддршка на бездомниците и на сите категории граѓани на кои што тоа им е неопходно“, порача Шилегов од Аеродром.

Во текот на вчерашниот ден ги посети и слаткарницата, кафичите и ќебапчилницата во населба Лисиче, како и штандовите кај Тобако 1 во близина на трговскиот центар Бисер.

Шилегов и неговиот штаб вечерта го посетија претседателот на СДСМ, Зоран Заев.

Денеска, на агендата на кандидатот за градоначалник за Град Скопје, Шилегов, е општина Карпош. Тој ќе го посети Кино Култура, по што ќе оствари голем број на средби со граѓаните од населбите Тафталиџе и Карпош 4.