Соопштение за јавност

Битиќи: Со новиот Буџет владата не се грижи за граѓаните туку само за удобноста на функционерите

Со Предлог Буџетот за 2025 година, Владата покажа неодговорност и самоволие и крајно игнорантски однос кон потребите на граѓаните но и препораките на експерите.

Покрај зголемувањето на јавниот долг, срамно е што истата оваа Влада, додека ја одбива поддршката за работниците, предвидува милиони евра за нови возила, повеќе од 7,5 милиони евра за удобност на функционерите. Ова не е буџет што се грижи за луѓето, туку буџет што се грижи за елитата, рече пратеникот на СДСМ, Фатмир Битиќи на денешната седница во Собранието за предлог Буџетот за 2025 година.

– Буџетот ги пресликува затечените состојби и потреби кои треба да се финансираат, но не и соодветните потреби за забрзување на економскиот раст и развој, а во исто време, гледаме дека Владата планира да потроши 106.970.000 денари за нов мебел, трошок кој е речиси петпати поголем од тоа што е потрошено годинава. Ова е јасен показател за погрешните приоритети на Владата, рече Битиќи

Тој се осврна и на основната точка во Буџетот, буџетскиот дефицит, чија проекцијата од 4% од БДП е јасен показател за неодговорност на Владата.

– Според Законот за буџети, максималниот дефицит треба да изнесува 3% од БДП. Но, што направи Владата? Наместо да го почитува законот и да управува со јавните финансии во рамки на утврдените граници, таа го игнорираше експертскиот совет на државата и своеволно одлучи дефицитот да го позиционира на 4% од БДП, рече Битиќи.

Она што загрижува, посочи Битиќи, е дека дури и овие 4% не ја претставуваат целосната слика. Владата не ги вклучува доспеаните, но неизмирени обврски на јавните институции и претпријатија, кои се очекува да достигнат 1 милијарда евра до крајот на годината. Ако се вклучат и овие обврски, реалниот буџетски дефицит не би бил 4%, (41,3 милијарди денари) туку 9.8% (101,3 милијарди денари) од БДП, тоа е алармантна бројка

– Оваа неодговорност ќе се прелее врз граѓаните, а зголемениот дефицит ќе значи зголемени долгови и поголем даночен товар за сите. Додека Владата зборува за „развој“ и „инвестиции“, фактите зборуваа друго. Согласно проекциите на Министерството за финансии, јавниот долг ќе достигне загрижувачки 62,7% од БДП до крајот на 2024 година, односно ќе се случи уште едно пробивање на законска обврска, за која од оваа Влада многу малку слушаме. Ако на овој процент се вклучат и ненамирените обврски на јавните институции и претпријатија, тогаш новата 2025 година ќе ја дочекаме со историски рекорд – јавен долг од 70,8% од БДП, рече Битиќи.

Кога го разгледуваме Предлог-Буџетот за 2025 година, мораме да се осврнеме уште еднаш на една суштинска неправда, како оваа Влада ги третира работниците во јавниот сектор. Во време кога инклузивноста треба да биде основен принцип, сведоци сме на длабока селективност. Селективност во тоа кои граѓани заслужуваат повисоки примања и сигурност, а кои остануваат на маргините, заборавени од политиките што треба да ги поддржат.

– Амандманот предложен од СДСМ, со кој се бараше зголемување на платите во јавниот сектор за 3,5 милијарди денари, беше одбиен без сериозна дебата од страна на мнозинството предводено од ВМРО-ДПМНЕ. Овој амандман не беше само обид за подобрување на животниот стандард на илјадници семејства туку и начин да се покаже дека државата го почитува Општиот колективен договор, историско постигнување што ја симболизира борбата за достоинството на работникот. Но, наместо почит, договорот беше погазен, оставајќи ги вработените во јавниот сектор без јасен план за раст на нивните примања, рече Битиќи.

Она што го критикуваме кај оваа Влада не е само обемот на дефицитот и јавниот долг, туку и начинот на кој тие се креираат, без стратегија, без визија и без реални инвестиции што ќе го забрзаат економскиот раст, додека огромни суми одат за нерационални трошоци или проекти без економска оправданост.

– Затоа, нашите барања не се во конфликт со критиките за дефицитот и долгот. Ние повикуваме на Буџет што нема да биде тежина за идните генерации, туку алатка за економска трансформација. Буџет што ќе вложува во луѓето, во инфраструктурата, во иновациите и во иднината и Буџет кој ќе биде одржлив на долг рок. Меѓутоа, предлогот за Буџетот за 2025 година покажува јасно отсуство на ваква визија, рече пратеникот на СДСМ, Фатмир Битиќи.