Мехмедовиќ и Царовска со граѓанскиот сектор од социјалата: Ќе има бесплатно болничко лекување за сите!

23/05/2017
00:00
Категорија: Соопштенија

Соопштение за јавност

Претставници на СДСМ, д- р Злате Мехмедовиќ, член на Комисијата за здравство и Мила Царовска, претседателка на Комисијата за труд и социјална политика имаа средба со претставници на организацијата ЛИЛ, за заштита на правата на жени и деца и со други претставници од граѓанскиот сектор но и од институциите, на тема бесплатно болничко лекување за корисниците на социјална парична помош.

Оваа мерка е дел од Програмата на новата реформска Влада и како што објасни претставникот на Комисијата за здравство на СДСМ,Мехмедовиќ, се однесува на сите граѓани.

-Сите здравствени осигуреници ќе бидат ослободени од болничката партиципација. Сметаме дека оваа мерка ќе го олесни финансиското оптоварување на сите, посебно на примателите на социјална помош. Сумата за социјална парична помош е многу мала, од 2.000 – 6.000 денари, далеку под прагот на сиромаштија. А денеска сиромаштијата зема замав. 180.000 луѓе, според СЗО живеат со по 40 денари на ден. 500.000 граѓани живеат под прагот на сиромаштија. Парите за оваа мерка, што пресметавме дека изнесува 420 милиони евра на годишно ниво, сега ќе биде на товар на државата којашто ќе биде должна да го финансира тоа бесплатно болничко лекување, рече Мехмедовиќ.

Тој посочи дека за респираторно заболување, хронична опструктивна белодробна болест партиципацијата е некаде околу 1.800 денари. За вградување бајпас е околу 6.000 денари, и дека во услов на стресно живеење и со големо загадување на воздухот, за граѓаните кои по неколку пати завршуваат во болница, оваа мерка ќе биде големо олеснување.

Преставниците на граѓанскиот сектор кои ги штитат правата на корисниците на социјална парична помош, укажаа на повеќе проблеми со кои се соочуваат овие граѓани, поради што во прашање е доведено здравјето дури и на деца.

Беше посочено дека има луѓе кои не можат да ги извадат од рацете и нозете шипките при хируршка интервенција, затоа што претходно не ја платиле партиципацијата за операција, поради што не им се дозволува натамошно лекување. Но беа наведени и низа други проблеми што ги имаат граѓаните со ниски примања и социјална помош. Станува збор за неподвижни лица кои немаат пари да платат превоз до Клиничкиот центар во Скопје. Или дека деца трпат проблеми со забите, затоа што родителите се социјални случаи и немаат да платат партиципација за лекувањето.

-Согласно ратификуваната и потпишана меѓународна Конвенција за заштита на правата на децата, Македонија мора да ги ослободи децата од плаќање на сите здравствени услуги и тоа сметам дека треба да биде приоритет на оние кои ќе донесуваат одлуки во Министертсвото за труд и социјална политика, како и да се изнајдат финансиски средства да се покријат овие трошоци, рече Царовска.

Таа објасни дека Македонија има низок процент на наталитет, има малку деца во државата, смртноста на новороденчиња е на многу високо ниво и државата мора да преземе мерки да ги заштити децата.

На дебатата беше поздравен чекорот што го прави СДСМ како предводник на новата реформска Влада, со тоа што веќе е подготвен законот што ќе овозможи бесплатно болничко лекување за сите.

-Ние ја градевме Програмата со вас, внимателно ве слушавме кога стававме мерки потребни за граѓаните. Нема да престанеме тоа да го правиме. Ова со бесплатното болничко лекување е почеток. Во право сте, здравството е бунар на проблеми, ама ќе ги решаваме чекор по чекор заедно со вас, порача Злате Мехмедовиќ од Комисијата за здаравство на СДСМ на дебатата со претставници на граѓанскиот сектор.