Костадиновска до Меџити: Граѓаните не сакаат нова депонија во близина на Битола, што направивте на оваа тема?
Пратеничката на СДСМ, Бисера Костадиновска Стојчевска, на денешната собраниска седница посветена на пратенички прашања, упати прашање до вицепремиерот и министер за животна средина и просторно планирање, Изет Меџити, а се однесуваше на изградбата на нова регионална депонија во близина на Битола, што предизвика бурни реакции на граѓаните, па дури и протести во Битола.
Во продолжение интегрален текст од прашањето:
Почитуван вицепремиер, деновиве до мене и колегите коишто доаѓаме од Битола, во овој парламент стига едно писмо од коешто би сакала да прочитам еден дел и од каде ќе го извлечам моето прво прашање:
’Иако градоначалниците од Битола и регионот ја најавуваат и презентираат изградбата на регионалната депонија, најавуваат објава на тендерски постапки за истата, јас како претседател на Совет, но и како сите советници немаме никаква информација во врска со депонијата.
Побаравме информации од Општина Битола, но во писмена форма на меил ни беше одговорено дека информација ќе ја добиеме кога ќе биде распишан тендер за изградба на депонијата.
Јавноста реагираше бурно на информациите објавени во медиумите дека во близина на Битола ќе се гради нова депонија, а со тоа се создаде паника и вознемиреност, која е оправдана бидејќи ни ние како Совет, па ни граѓаните, имаме доволно информации за депонијата.
Би сакала исто така да ве известам дека загриженоста на граѓаните се преточи во протести кои беа со конкретни барања.
Знаејќи ги нашите надлежности, прво како граѓани, но и како советници едногласно го прифативме предлогот на советникот Иван Чулакоски – Заклучок со кој Советот на Општина Битола бара од Владата на РСМ измена на локацијата за регионална депонија‘.
Оттука моето прашање е следно: Дали вие како министер за животна средина и просторно планирање во рамките прво на вашето министерство, потоа на ниво на Влада го разгледавте заклучокот којшто беше едногласно изгласан од советот на општина Битола од сите советници кој се изгласани од граѓаните на Битола, кој побараа дислокација на регионалната депонија?
Дали вие како министер за животна средина сте одржале состаноци со општините во Пелагонискиот регион за да ги информирате за целиот процес за регионално управување со отпад и изградба на нова санитарна регионална депонија?
Граѓаните реагираат дека не сакаат депонија во Новаци, во Битола има протести, би сакала да знам што вие направивте на оваа тема?
