Соопштение за јавност
Претседателот на СДСМ, Зоран Заев, денеска се сретна со амбасадорката на Кралството Белгија, Аник Ван Калстер.
На средбата се разговараше за актуелната политичка криза во Македонија и излезните решенија.
Заеднички е констатирано дека целосното повлекување на аболицијата беше неопходно во напорите за обезбедување на еднаквост на правдата во Македонија, како и за одблокирање на политичкиот процес за изнаоѓање мирно решение на кризата.
-Потребно е што поскоро да се организира Влада според предвиденото во Договорот од Пржино, којашто преку прецизни рокови ќе може да ги обезбеди потребните услови за фер и регуларни избори во Македонија. Тоа се пред утврдување Избрачкиот список и објективно медиумско известување. Со политичка волја ова е брзо и практично изводливо, со што изборите би можеле да се одржат наесен. На граѓаните им е потребна стабилна и чесна Влада избрана на веродостојни избори, рече претседателот Заев.
На средбата се разговараше и за потребата од функционирање на независни институции во Македонија, како што е Специјалното јавно обвинителство.
-Затоа СДСМ, опозицијата и граѓаните на Македонија бараат Уставниот суд што побрзо да се изјасни за уставноста на Законот за СЈО, со што ќе се овозможи оваа институција ефикасно да ја заврши својата работа. Оваа институција е искра надеж за граѓаните дека е можно возобновување на демократскиот поредок во Македонија, објасни претседателот Заев.
Претседателот Заев и белгиската амбасадорка заеднички констатираа дека граѓаните на Македонија заслужуваат подобар живот, а Република Македонија место во ЕУ и НАТО, поради што секој треба да го понесе својот дел од одговорноста на тој пат.
10.06.2016
ЦЕНТАР ЗА КОМУНИКАЦИИ СО ЈАВНОСТА
СОЦИЈАЛДЕМОКРАТСКИ СОЈУЗ НА МАКЕДОНИЈА
