Матните бизнис зделки поврзани со увозот на струја ќе излезат на површина и за нив ќе има одговорност, порача денеска претседателот на СДСМ, Венко Филипче.
Филипче обвини дека власта лошо го менаџира енергетскиот систем, го намалува домашното производство на струја и увезува електрична енергија преку фирми блиски до луѓе поврзани со власта.
„Многу лошо се менаџира тој систем, имено производството на струја значајно намалено. Само минатата година за 30% се потфрли во производството на струја, како целокупниот хидроенергетски потенцијал на земјата да не работи. Толку струја не е произведено во земјата, само ниту половина од стратегијата за производство на струја не е исполнета. Биле најавени околу 5 гигават-часови, не се исполнети. Ниту 2,5.“, обвини Филипче.
Филипче укажа дека власта увезува струја преку нејзини блиски фирми.
„Власта увезува струја, преку фирми блиски на нивни луѓе. Тоа е врската со новоназначениот пред неколку месеци српски конзул Душан Адамовиќ, за кој што не сакаше премиерот да одговори дали и од каде го познава. Меѓутоа и тие конекции ќе излезат на површина. И за тие матни бизнис зделки на сметка на граѓаните ќе одговараат и ќе ги враќаат парите. Јас мислам дека ќе се поскапи и струјата и парното. Гледаме тенденциите, обидите.“, потенцираше претседателот на СДСМ, Венко Филипче. ‎