Соопштение за јавност

Додека функциониери на власта осомничени и обвинети за тежок криминал не се ниту во куќен притвор, во Македонија новинарите со месеци се држат во притвор за напишан збор.

Случајот со новинарот Зоран Божиновски кој повеќе од една недела штрајкува со глад а неговото здравје е влошено, потврдува дека Македонија под власта на ВМРО-ДПМНЕ и обвинетиот Никола Груевски, стана земја на затворани и репресирани новинари и на неслободни медиуми, без почитување на основните човекови права.

Власта со години на мафијашки начин се пресметува со сите свои неистомисленици, а новинарите се особено на удар за да бидат замолчени. Извештаите на сите релевантни меѓународни организации, меѓу кои на Репортери без граници и на Фридом хаус, потврдуваат дека Македонија е неслободна земја.

Го повикуваме режимот во заминување на обвинетиот Груевски да престане да ги злоупотребува државните институции и инсталациите од тефтерчето на Јанкулоска во судството за да се пресметува со сите што не мислат како него и што не одработуваат за неговата мафијашка власт.

Исто така, апелираме да се почитуваат сите законски процедури и меѓународни конвенции поврзани со човековите права во врска со Зоран Божиновски, особено што станува збор за новинар.

Скопје, 23.09.2016

ЦЕНТАР ЗА КОМУНИКАЦИИ СО ЈАВНОСТА
СОЦИЈАЛДЕМОКРАТСКИ СОЈУЗ НА МАКЕДОНИЈА