Соопштение за јавност

Ниту едно празно обвинување на ВМРО-ДПМНЕ не може да ги прикрие штетите од нивното 11 годинишно криминално и расипничко владеење, ниту пак може да ги поништи придобивките од успешните економски политики на Владата предводена од СДСМ.

За неколку месеци, Владата предводена од СДСМ спроведе низа мерки коишто обезбедуваат повисоки плати, нови работни места, економски раст и повеќе пари кај граѓаните.

Законот за минимална плата ја отвори спиралата на раст на платите, денес 90.000 граѓани добиваат повисока плата, а просечната плата бележи раст од 4,6 отсто. Со новата мерка за поддршка на зголемување на платата на работници во трудоинтензивните дејности се отвора можност за зголемување на платите на дополнителни 50.000 работници. Зголемување на платите е обезбедно и за вработените во одбраната, образованието и здравството.

Трајно се решава проблемот со стечајните работници и околу 5.000 стечајни работници добиваат месечен материјален надоместок од 7.596 денари. Укинувањето на радиодифузната такса и воведувањето евтина тарифа на електричната енергија, ги намалува трошоците за живот и обезбедува повеќе пари кон граѓаните.

Преку Планот за економски раст се реализираат 11 странски инвестиции и за разлика од скапите и неуспешни реклами и роуд шоуа на ВМРО-ДПМНЕ, за новите инвестиции не е потрошен ниту еден денар од парите на граѓаните.

Владата предводена од СДСМ одгвоорно управува со парите на граѓаните. Преку успешните политики јавниот долг во 2017 година за првпат забележа пад, долговите редовно се сервисираат, а за разлика од скапите, тајните и нерационалните задолжувања на ВМРО-ДПМНЕ по екстремно високи каматни стапки, успешните економски политики на Владата предводена од СДСМ ја враќаат довербата во економијата и Македонија добива историски најниски каматни стапки.

Наспроти лажните обвинувања на ВМРО-ДПМНЕ, ова се само дел од бројните реални економски параметри што ја потврдуваат исправноста на економските политики на Владата предводена од СДСМ. Очигледно е дека ВМРО-ДПМНЕ не може да се помири со успесите во економијата и затоа очајно продолжува да шири лажни вести и се обидува да манипулира со граѓаните, што впрочем е нивниот единствен начин на делување.

Скопје, 06.05.2018

ЦЕНТАР ЗА КОМУНИКАЦИИ СО ЈАВНОСТА
СОЦИЈАЛДЕМОКРАТСКИ СОЈУЗ НА МАКЕДОНИЈА