Владата и предочи на јавноста дека со исклучително внимание го разгледува извештајот на Стејт Департментот на САД,  дека сите забелешки ќе бидат адресирани до засегнатите чинители со цел уште повеќе да ги зајакне антикорупциските политики и да ја подобри инвестициската клима во Северна Македонија. 

„Владата е одлучна и сериозно посветена на решавање на наталожените и децениски проблеми, а справувањето со високата корупција и организиран криминал е на врвот на приоритетните национални реформи кои веќе испорачуваат резултати. Прочистувањето на правосудството, постојаното зголемување на транспарентноста на институциите, новата стратегија за конфискација на имот, дигитализацијата на институциите со која се отстранува човечкиот фактор при носењето одлуки и унапредувањето на системот за јавни набавки се неповратни процеси кои претставуваат препрека и закана за секој поранешен, актуелен и иден функционер кога е во прашање корупцијата.

Дека ваквите процеси даваат веќе видливи резултати говорат и расчистените судски процеси низ кои повеќе високи политичари се осудени за сериозни кривични дела, а десетици се во напредни судски постапки и се очекува конечен исход од страна на судовите. Правосудството ги има сите услови за професионално и непристрасно одлучување, ослободено е од какви било влијанија на извршната власт, а органите на прогонот несомнено постапуваат неселективно, без разлика за кој функционер станува збор.

Меѓународните и домашните извештаи со сите нотирани податоци, се дополнителен мотив за Владата да продолжи со континураната и неселективна борба против корупцијата, за обезбедување систем во кој институциите се во служба исклучово на граѓаните. Со сите преземени мерки и предвидени иницијативи, Владата на Северна Македонија упатува сериозна порака до сите носители на јавни функции дека учеството во коруптивни активности не се исплати и сериозно ќе биде казнето“, соопшти владата.