Прес-конференција на СДСМ, Мартин Костовски, пратеник на СДСМ

Почитувани граѓани, почитувани новинари,

Криминална афера со препродажба на парцели вредни на 1,6 милиони евра ја тресе ВМРО-ДПМНЕ предводена од Христијан Мицкоски.

Шест лица меѓу кои партиски функционери на ВМРО-ДПМНЕ и лице од обезбедувањето на Мицкоски се осомничени за малверзации каде парцели земјиште се препродадени и до 50 пати повисока цена на ЕВН Електрани.

Голем дел од овие осомничени лица се донатори на ВМРО-ДПМНЕ и на кампањата на Данела Арсовска. Помеѓу донаторите е и лицето Орце Тодоровски, близок до Мицкоски и бизис партнер од хидроцентралите.

Оттука, Мицкоски како прв човек на ВМРО-ДПМНЕ треба да одговори каде завршиле 1,6 милиони евра?

Дали на овој начин се финансира неговата ВМРО-ДПМНЕ?

Не е првпат шеф на ВМРО-ДПМНЕ да биде вмешан во купување и препродавање парцели земјиште.

Никола Груевски е осуден на седум години казна затвор за случајот „Плацови на Водно“.

Во овој предмет се докажа дека Груевски со 1,3 милиони евра, пари од партиската каса купил атрактивно земјиште од илјадници квадратни метри на Водно.

Јавноста памети дека токму шефот на обезбедувањето на Груевски, Дејан Митрески – Урко бил тој кој ги лоцирал парцелите на Водно, а тоа беше објавено и во материјалите од „Вистината за Македонија“.

Дали Мицкоски се инспирирал од овој случај, па ја искористил истата шема со човек од обезбедувањето да ги прикрие трагите за испумпување пари од ЕВН Електрани?

На овие прашања одговор треба да даде Мицкоски, а одговори секако ќе даде и отворената истрага од надлежните институции.