Соопштение за јавност

Претседателот на СДСМ, Венко Филипче, обвини дека демократските столбови на државата се минирани од актуелната власт, која има целосна контрола над судството и обвинителството, а роднини и пријатели се поставуваат на клучни позиции како обвинители и судии.

„Нашите предлози никој не ги прифаќал од власта. Таква е ситуацијата во парламентот. Се поставува прашањето како треба да се однесува една ваква власт која има огромно мнозинство во парламентот. Дали треба да се партизира се по секоја основа? Првите работи што ги направија беа да ги сменат независните комисии со промена на закони. Има млитава Комисија за спречување на корупција, сега има најава за поставување на луѓе блиски лично до премиерот како директор на МРТВ. Имаме резолуции во парламентот кои го ограничуваат тоа што позицијата може да зборува. Замислете како демократските основни столбови во државата се практично минирани од оваа власт, која нема друго објаснување освен дека има апсолутистички манири на владеење“, додаде Филипче.

Тој нагласи дека процесот на партизација се одвива континуирано, откако ДПМНЕ е на власт.

„Тоа беше уште во 2024 година. Ги партизираат сите институции, поставуваат несоодветни луѓе на највисоките позиции во безбедносните служби, со сомнителни сертификати, злоупотребуваат механизми на полицијата. За време на изборите во 2025 година, видовме целосна партизација на институциите, неспроведување на реформите во ниту еден сектор, а во некои сектори делумно, и тоа не по препораките на Европската унија“, појасни Филипче.