Прес-конференција на СДСМ, Жаклина Лазаревска, пратеничка на СДСМ

Почитувани граѓани,

Почитувани претставници на медиумите,

Како претседателка на собраниската Комисија за образование, наука и спорт, сакам да ја информирам јавноста, а особено наставниците и стручните соработници дека за утре, 18, февруари закажав продолжение на седницата на која треба да дискутираме за Предлог законот за наставници и стручни соработници во основното и средното образование.

Ова законско решение предвидува зголемување на платите на сите наставници и стручни соработници во основното и средното образование со раст на минималната плата.

Овој Закон предвидува квалитетно решение за работниот однос на над 4700 вработени во училиштата кои со години работат, а не можат да го трансферираат работниот однос бидејќи предаваат во повеќе училишта или предаваат изборни предмети.

Овој Закон обезбедува соодветно вреднување на трудот на сите наставници и стручни соработници кои предаваат во комбинирани паралелки, во паралелки со деца со попреченост или имаат дополнителни задолженија.

Пратениците од ВМРО-ДПМНЕ цела година го блокираа Законот и работеа на штета на наставниците и стручните соработници кои поради ваквиот неодговорен однос, речиси цела година земаат пониски плати.

Бидејќи пратениците од ВМРО-ДПМНЕ исто такво решение доставија во собраниска процедура, со што признаа дека станува збор за добар закон, ги повикувам и апелирам до нив на утрешната седница да бидат конструктивни и конечно да почнат да работат во интерес на граѓаните.

Ви благодарам