Храбрите борци на НОБ, кои пред 80 години се кренаа на востание против окупаторот се најзаслужните што денес ние, со кренати глави го чуваме аманетот и живееме во слободна и самостојна држава.

На овој 11 Октомври, на кои се одбележуваат точно 80 години од почетокот на Народното востание и зачетокот на македонската држава, Северна Македонија стои гордо исправена, рамо до рамо со нашите сојузници во НАТО, со сигурен национален идентитет и признат македонски јазик. Со тоа е остварен сонот на нашите државотворци кои граделе земја на сите – Македонци, Албанци, Турци, Власи, Срби, Роми, Бошњаци и сите други. Денес Северна Македонија продолжува да гради општество отворено за еднакви можности, општество за правда, одговорност и еднаквост – Еднакво општество за сите.

„Македонскиот народ никогаш не окупирал и не земал туѓо. Нашите големци и дејци од минатото ги паметиме по големите космополитски идеји кои ги надминуваат границите на националното. Нашата борба секогаш била само да се биде свој на своето и да се подава рака, да се трага по заедништво. Стремеж за држава на сите и за сите, пријател со сите“ кажа премиерот Зоран Заев во неговото обраќање на прославата на 11 Октомври.

Премиерот Заев прими и плакета од борците на НОВ од Србија, за неговиот значаен придонес во афирмацијата и негувањето на вредностите и традициите на антифашистичката борба, којашто му ја врачи претседателот на Сојузот на здруженијата на борците од народно-ослободителната војна (СУБНОР) на Република Србија, Видосав Ковачевиќ.