Прес-конференција, Гоце Георгиевски, претседател на Комисија за земјоделство, шумарство и водостопанство на СДСМ

Почитувани граѓани, почитувани земјоделци,

Социјалдемократскиот сојуз на Македонија стои на дадениот збор. Даденото ветување дека Владата ќе воспостави Интервентен фонд во земјоделството е остварено.

Го слушаме гласот на граѓаните, а политиките кои ги спроведуваме се одговор на тоа што е потребно. Во услови на криза, обезбедивме средства во износ од 250.000.000 денари, кои се наменети за земјоделците кои се соочуваат со потешкотии во производството.

Дел од овие средства, односно 120.000.000 денари претставуваат директна поддршка за набавено вештачко ѓубре за производителите на пченица и јачмен, односно 2500 денари по хектар.

Дополнително, преку интервентниот фонд, ќе се реализира директна поддршка и на одгледувачите на овци, каде поддршката изнесува 400 денари по грло предадено јагне во кланичен капацитет за периодот од јануари до мај 2022 година.

За одгледувачите на свињи, интервентната мерка изнесува 1500 денари по грло за гоеници над 90 килограми, кои се одгледани и предадени во кланичен капацитет за периодот од февруари до април 2022 година.

Почитувани земјоделци, во услови на огромна светска економска криза која е последица од војната во Украина, Владата предводена од премиерот Ковачевски, е силно насочена кон одржувањето на стабилниот курс на домашното стопанство. Институциите се мобилизирани и будно ја следат состојбата и активно работат на надминување на сите предизвици. Интервентниот фонд е уште еден механизам за ублажување на предизвици во земјоделското производство, кој во наредниот период ќе се проширува и дополнува со нови мерки.

СДСМ е одговорна партија и се грижи за сите земјоделски гранки подеднакво.